返工利是

由於公司有幾個判頭，而好多時佢地有o的o野都會叫我幫手打...
所以新年少不免要封番封利是俾我...
識做o既，通常都會俾一百，有o的會俾五十，有o的更石o既，廿蚊都夠膽俾...

須知道，一年我都要幫佢地攪唔少文件...
對於俾廿蚊我o既判頭，我通常都會嗤之以鼻！(心裡發出"o即o即"聲)
俾一百蚊o既，我心裡會想：都算你識造...o黑o黑！

雖然係現實o左少少，
但這是一年中我唯一有賺的日子啊！

好心o的判頭搵咁多，咪鬼慳o個一百幾十啦~~
平時我已經白幫佢造o野...
唔係我老闆叫，我真係睬佢地都傻！一.一

時光

新年過去了...
眾人正式回到工作崗位，市面回復車水馬龍...(塞車)
有時不禁概嘆時光飛逝，這是年紀大的人的毛病吧？

也許是雙魚座的特性...
常常會傷春悲秋，一首歌、一句說話也致令淚光浮現...
尤其午夜，經常悲從中來...
(已經不想再將下半部文字寫出來...唉~)

葡京自助山 食後報告

忘了鳴謝 mommy 打電話給我說 happy birthday 添~~
不好意思o我！讓你花錢打長途電話... :>

昨晚生日只係去o左新葡京自助餐，跟住冇乜地方...
食完自助餐，同我去食o個個 fd 要返公司開會，叫我o係度等佢半小時...
哇~~
o係呢半小時內，我輸o左 $ 300-
哇~~~
我本來俾自己o既 budget 係 $ 200- 玩大小
點知，當我下注 $ 100- 時，荷官告訴我至少買 $ 200-
咁我好無可奈何地俾多 $ 100- 出來... Y.Y
輸o左！
再去第二度投住 $ 100-
雖然 win o左，但都係輸o左 $ 300-
哇~~
唔制呀~~~




昨晚食o左 新葡京自助山~每位 $ 180 + 10% => $ 198-/位
可直接駕車入停車場，自助餐包 2 小時免費泊車、逾時 $ 10-/一小時。
(停車場入口：行車天橋腳 左手面入，即加思欄對面。)

冷盤：生蠔 ~ 一個字：霉！ 一食落口吐都吐唔切！完全唔掂o個隻~~

長蟹腳 ~ 食到火都o黎埋！因佢冇(當刂)開一半，就咁成隻！好難食到o的肉。

三文魚、吞拿魚 ~ 幾新鮮！

八爪魚 ~ 唔掂！覺得好唔新鮮！

尚有：青口、大頭蝦，我冇食到。

日式螺頭、太卷等都 ok~

熟食：西冷扒 ~ 唔錯！ (另有 火腿)

炸蝦天婦羅 ~ 細蝦，搶咁！一炸好即刻冇晒！ (好彩我係女人！男人都唔夠我爭！ )

鐵板燒 ~ 牛肉，一般。

仲有好多o野：牛肋骨、咖喱羊肉、叉燒、片皮鴨、油雞、蝦餃、燒賣、叉燒包、白灼蝦、麵、沙律、炒麵、炒飯、雜菜、湯等，其實都唔錯，種類好多！
(多"金沙"好多)

另有一缸大頭蝦，俾 細路仔 撈蝦後即時幫你白灼~

甜品：古力噴泉、同係"不夜天"o既甜品~每人包一杯飲品 (coffee/tea/lemon tea)

對今次 buffet 感覺：
侍應人手嚴重不足！(全部勞工，講國語。)
好耐都冇人埋o黎收碟、又冇人斟水，要叫先斟。
入場又混亂，等好耐先有人理你，帶位又帶錯！
如果多老人家去，要食熱葷，去 新葡京 好適合！因為佢其實算係幾多o野食，而o的o野食都 ok，食得入口。

但佢o的冷盤好唔掂！
如果志在食生蠔涷蟹，建議去 Sands~ (但 Sands 冇乜熱o野食)

甜品幾好味，話晒一睇就知係不夜天出品。

可惜一開始食時，拎乜都要排隊， 20 分鐘後，就唔多使排隊了。
整體評分有 70 分！ (但我唔會再去第二次)

報告完畢！ (顧住食，唔記得影相。 :p )

P.S. 食物檯 離座位都幾遠o下，要行多好多路！

happy birthday to me

呢個係芒果慕士古力蛋糕，係葡京"不夜天"出品。
好香好香，o岩晒我~~ :>
當然我仲未阿 Q 到自己買個蛋糕返來，係人地送的。
不過一個人食晒一個蛋糕，都頗有點難度。
或者切一半拎去俾我個妹吧！-.-"

年初六 ~ 返工日

今早返工，我老闆返到來見到我，好驚訝咁問我：乜你唔係星期一先返o羊？

我：我唔好意思咁遲返o麻~~佢地都初五返。

我老闆：你點同佢地o者？佢地係 xx 公司o架o麻~ (係做 系統保養 的)
<因我老闆兩間公司o係度>
你返來都係坐o架啦，o的判頭又未開工...

我：..................(心裡在嘀咕著，早知星期一先返啦~~ xp )


漏o左講一件事...
前晚我去書店睇書，睇完走o左去食 印度咖喱 (自己一個)
當時我背住一張檯坐，後面係一檯年青人。
我食呀食呀...
突然間聽到...
有人問：點解會來呢間食o既？
有人答：你冇睇藍雨個 topic o羊？佢介紹呢度好味o架...
我：............................(混身僵硬)

又會咁o岩o既？
我因為有玩澳門o的討論區，所以知佢地係邊o的人...
我食完就走，慌死佢地知我係邊個咁...:p

紅酒

寂靜的晚上，與我為伴的良朋 ~ 酒精。
有朋友送了一箱紅酒(6 枝裝)給我，我當然立即開箱品嚐。
我喜歡紅酒，因只需啖一小杯，很快便會安然入睡，可省卻不少胡思亂想的時間... :p
老實說，我並不懂得欣賞，買的也不過數十元的紅酒，
但我可要求不要酸澀，否則會難以入口，變為雞肋。

昨晚約了少見的朋友去宵夜，是去"黑沙"吃燒烤...


宵夜完後，他們又說要去 新葡京 發新年財！
由於我昨日中午已發了小財，故昨晚自己限額一百元。
第一局已經 win 了一百，跟著手中 win 了四百。
到最後，只餘兩個一百籌碼，即走！
即是 win 了一百呢~~ :p
(再發財要留待下年新年了！ :p)

回家睡覺時，不知是否宵夜時店舖的肉類變壞，胃酸翻騰、嘔吐大作。
嘔了一輪才睡呢~~
幸好今早無礙呢~~:>

發新年財

今日係年初三，赤口。
約o左幾個舊同學去飲茶，飲完茶後經商議，節目係去逛新開的賭場。

先去 星際，即係梁朝偉賣廣告o個間~
我乜都唔識，只識玩大細，好彩我有袋港紙，因為只限港幣投注。
我唱o左 HK$ 500-
我 fd 同我換o左 $ 200- 我玩 $ 300-
已決定限額 3百，玩完就走。
我地連買 5 鋪大小，我每次買 $ 200-
結果我 win o左 $ 1,000-

跟住我地去 永利~
永利 入面暗沉沉，樓底矮！
我輸o左 $ 300-
當然即走~~

再行去 新葡京
不過只係行，冇再買~
入面裝修都幾光猛！幾靚！

今日結算 win o左 $ 700- ^.^Y

過年

轉眼又過了新年...
往時過年，好多食店都會開，但可能今年經濟好，好多食店都休息...
一條街可能得一兩間舖頭有開...
尋日年初一，我媽中午打電話俾我，叫我夜晚自己食飯，佢約o左人...
我一聽到，即刻諗唔知去邊度買飯...
果然，夜晚周圍逛，得 M 記有開，唯有食巨無霸餐...:p

過年期間，好多人都會燒炮仗，我至怕！
最怕燒炮仗﹗
我覺得好恐佈！o的人都唔知點解會咁鍾意玩...=="

年三十晚

還有一小時就踏入年初一了！
舊一年過去，新一年來臨，我依舊沒有甚麼期望與願望...
從來我就是個隨遇而安的人，雖然是急性子... :p

昨天問老闆我的開工日，
我老闆卻跟我說：你哪日有空便哪日，自己決定吧！初十也可以呀！
我知公司其他同事是返初五，我也不好意思初九才返工，故跟他說了我初六吧！:p

新的一年即將來臨，祝各位網友：心想事成！身體健康！ :>

年廿九

今日係今年最後返工o既一日...
仲未知係年初幾返工，不過多數都係初五...
其實我覺得，每個人最期待o既係 年三十晚！
因為年三十晚o的人一定會出街逛，所有倒數活動都係年三十晚...
但倒數完就會散 band！
一到年初一就好悶，o的舖頭好多唔開，至大o既娛樂就係去睇戲...
仲有，好多人都會去賭場發新年財...
記得舊年我都有同o的 fd 去賭場，每人夾 $ 200-
玩完就走...
我記得舊年我就袋o左 $$$ 走了... :>
希望今年都會啦~:p

年廿八

今日年廿八，但我尋晚已經o係屋企執廚房，
將我o的用具執好，再丟咁o的唔用o既o野...
廚房o既櫃俾我o的用具塞爆晒！
今晚輪到換床鋪了！

尋日係情人節，尋晚我一個人走o左出去食麵，
跟住去逛書店，原來星光對面間 宏達 專賣國內版圖書...
我就買o左：2本冷衫書、2本手作仔書、1本"一個人住第5年"漫書書 (popo 推介)
國內版書有個好處，就係：平！
5 本書先 $ 140- 有找

我本身唔鍾意睇簡體字，如果買小說等，我就唔會買簡體字書...
但工具書就唔同！
如果買冷衫書，閒閒地百幾二百蚊一本，但大陸出o既，$ 3x- 就好厚了！

真係抵買！

冷衫完成了

尋晚終於織起件冷衫、縫埋，本來諗住趕過新年著...
但呢排天氣咁熱，又大霧，要等出年冬天先有機會著了...
縫完對眼好鬼累！

天氣報告話來近一星期都有煙霞，氣溫徘徊o係 24 度，想死！

而家 2 月o乍！

澳門已經開始冇我至愛o既冬天了...

椰汁年糕

連續蒸年糕 蒸o左 4 日，蒸o左 10 底都有，由於所花時間太多，今日已經到o左厭惡階段。

出年唔蒸咁多了...

材料： (9.1/4" 圓形錫紙模一個)
糯米粉 600g (一包檽米粉)
冰糖 600g
椰漿 400g (一罐大椰汁)
清水 500 ml
澄麵 150g

做法：
1) 將冰糖加水煮溶待凍，待凍後加入椰漿 用 篩過~
2) 加入糯米粉和澄麵（粉要篩過）於粉漿中，攪勻用篩隔 2 次，直至挑起粉槳即瀉下為合。
3) 倒入已塗油之糕盆內，隔水蒸約 90 分鐘。

銀紙香味

今日收到第一封利是，HK$ 2,000-
是我老闆的老爸給我的，他常叫我幫他打講稿 (他是澳門的知名人士)，壹年才二千元。化算吧！
他的公司就在我樓下，不明白他何以不叫他公司員工替他打...一.一

拆開利是的一刻，是新出的港幣千元銀紙...
好香啊！
原來我都頗喜歡新銀紙的氣味...o喜o喜~~

我其實有點兒潔癖耶~~
雖然家裡亂槽槽的，但我手一接觸過銀紙，便會徹底洗淨，因怕細菌多多。
但郤原來，我喜歡新的千元鈔票...

07 新年習作 ~ 桂花馬蹄糕

昨日 & 今日都係 蒸馬蹄糕日~

今年唔蒸 椰香馬蹄糕了，改蒸充滿桂花香o既 桂花馬蹄糕~

總共蒸o左 6 盒馬蹄粉，用了 3 斤已去皮之馬蹄。

至於年糕，要留待下星期六日再去蒸了... :p

材料： (以下材料份量均以用 "一盒馬蹄粉"份量計，可蒸 2 個 3.5" x 7" 的長方模。)

馬蹄粉 一盒 (250 g)

馬蹄 半斤 (我買已去皮之馬蹄)

冰糖 200-300g (自己試味，我只用 220 g，因馬蹄本身有甜味。)

桂花糖 一包 ($ 5-/一小包， 同豐雜貨 有售。亦可省略。)

清水 4 cup (量杯中 cup 之份量)

油 少許 (掃糕盤用)

造法：

1) 馬蹄洗淨，用刀拍扁備用。

2) 用一半份量之清水開稀馬蹄粉，拌勻成粉漿。

3) 用餘下之一半水份量煲滾，煮溶冰糖，溶後熄火。

4) 趁熱把馬蹄粉漿 倒入熱糖水中，拌勻，再開細火不停攪拌，

直至出現膠著狀態(稀糊狀) 立即熄火，以免黐底。

5) 倒入 馬蹄 及 桂花糖 ，不斷攪拌。

6) 糕盤掃油，然後將馬蹄粉漿倒入糕盤。

7) 大火蒸 40 分鐘。出爐後立即要倒掉糕面上的倒汗水，以免發毛。

8) 冷卻後才脫模，便可煎香享用。

註：

1) 如喜歡有少許椰香味，可以 3.1/2 cup 清水 + 1/2 cup 椰汁 代替清水。

2) 如不喜歡桂花香，可省略該項。

3) "同豐雜貨" 位於營地街市 豐澤電器 對面。

發雞盲

尋晚我發現又織錯o左個花，但我都費事拆了！
一陣拆o左我織唔番仲煩！
兩隻袖都有一個花織錯o左！唉~~
唔鬼理！
o的人唔係咁得閒會走埋o黎睇o瓜~~:p

我明明已經睇住o黎織，已經好小心，都唔知係咪發雞盲！=="