蒸聖子王

呢排唔知做乜有鋪煮飯癮！

可能因為返學期間實在食太多飯盒，攪到而家讀完後，寧願煮o下飯...

今日入街市見到有 聖子王，所以買o左 30蚊返o黎蒸豉汁！

下面o個碟本來係 煎蠔仔餅！

但我呢個大懵o既人，整o既時候唔記得係要煎，就咁當炒蛋咁炒...

炒炒o下發現唔對路，先記得應該係用平底鑊o黎煎...=="

咁咪有繼續炒...

好彩，好好味o者！

hehe~~xp

魚缸新貌

尋日動手將缸入面所有草拔除！
就只餘下相中的水草...
個缸立即空o左好多！好似新缸咁...
事關我之前係咁買買買，長晒就攪到個缸好亂咁...

而家個缸望落都 ok，不過無晒草俾蝦仔食咁...

白灼基圍蝦

今日放工突然間想食蝦！
於是走入街市貢o下...
見到 28 蚊斤 游水基圍蝦，仲係中蝦...
梗係立即買一斤返屋企啦~~
點知.......................................................原來一斤係好多o架！
結果...我只係食o左少少飯...
係咁食蝦、係咁食蝦........
我有排都唔會再買蝦了！=.="

鬆一鬆

成績揭盅了！
幸好不用補考，哈哈~~

我諗我有一排都唔會去讀書了！
因為真係捱夠！
係時候又過番o的上下網、睇o下書o既日子~~ :>

家常便飯 + 簡易懶人叉燒

今餐晚飯：豉汁蒸帶子 + 自製叉燒 + 白灼芥蘭 + 鹹蛋 xp

幾新鮮幾多糕~~

隻鹹蛋都唔知係咪假o既！

有乜理由個黃 細到咁o架？！

終於又讀完呢個短期課程啦~~

今日又係慰勞一下自己o既日子！

走去街市買o左 6 隻新鮮帶子 (共 30 元)~

再加上自製~~~ 懶人叉燒~

肉類：豬頸肉 一塊 <或 可用 梅頭肉>

醃料：

李錦記叉燒醬 4-5 湯匙

花雕酒 2 茶匙

糖 1/2 茶匙

生抽 1-2 茶匙

另備：蜜糖 適量

造法：

1) 豬肉可切開數小件(或一整塊)，放入所有醃料，醃最少三小時。 (要放雪櫃，否則易變壞。)

2) 預熱焗爐，用 180 度 焗 15 分鐘，後再翻轉豬肉 再焗 15 分鐘。

(如果豬肉厚，要每面焗 18-20 分鐘。)

3) 焗好後，取出塗上適量蜜糖，再入焗爐焗 3-5 分鐘。

4) 取出，切件，即可享用~~

最後一夜

尋晚係讀呢個課程o既最後一晚考試...

今晚，成班同學約埋阿 sir 去食飯，去食海鮮...

食飯時幾乎俾同學 隊lum... (坐我隔離o個個係咁斟啤酒俾我)

相信，今晚係最後一夜的聚會...


不要相信一切有下次...

紅太陽 魚b

家中紅太陽魚，生了 8 條魚 b...

唔知今次能否成功養大呢？

...

我魚缸的近照...

雷電交加的雨夜...

一個人
+ 一台電腦
+ 一顆寂著的心...

抑鬱

每日返工放工返學放學，個人總係累累的...
連魚缸都要等星期六日先得閒攪...
蛋糕更加係無整！
有時連網都唔想上...

不過雖然係咁忙，
但唔知點解總係有o的抑鬱、以及心靈空虛o既感覺...
唉...