再見 Rainy day

尋尋覓覓,冷冷清清,淒淒慘慘戚戚...

星期四, 8月 30, 2007

失聲

前日開始喉嚨痛,立即食消炎藥...
但食o左都係痛,結果尋日起身已經開唔到聲!
咁當然立即去睇醫生...
而家講o野好細聲之餘,好似機械人咁聲!
聲音沙啞有回音!
扮變型金鋼聲一流...=.="

尋晚返學先慘!
食o左藥瘟o下瘟o下咁,釣晒魚。
早知唔返學...@@"

星期日, 8月 26, 2007

懶死

自己懶o左咁耐,呢兩日突然好想飲湯...
於是尋日就燉o左雞湯、今日就煲o左青紅蘿蔔雞腳湯...
等自己補一補...:p

雪櫃o舊芝士將會過期,自己都懶得去整...
係上星期我媽叫我整個 cheese cake 俾佢朋友,
我先拎出o黎整。

唔知點解,我今年直頭無 整月餅 o既意欲添!
所以今年可能唔整了。

自己都覺得懶到出汁!=.="

星期五, 8月 24, 2007

我一直珍惜你,知道你欠缺的是甚麼,我盡量去令你感覺得到...

想不到你一如豺狼,頃刻暴露了你原始的慾望。

是我天真的被蒙騙了?還是我不曾了解你的真正所求?

我以真心相待,你卻輕蔑帶過...

也好!

一如柳絮輕煙,過後無痕...

星期二, 8月 21, 2007

自作孽

今日我開始調節自己o既情緒,對於唔應該理會o既事情,我盡量唔去想。

明明呢個遊戲規則係我自己訂出來,但我竟然踩過界...

幸好及時發現,並加以控制抖正,否則,真正是自作孽!

星期日, 8月 19, 2007

唏噓

頭先落"文化廣場"睇書,見到以前一對中學同學,佢地已經結o左婚,
拖住 2 件仲陀住第 3 件 (大肚),真係發覺歲月不饒人...

人地已經一家五口,好 warm。

我仲係孤家寡人...

突然間,落寞的感覺湧上心頭...

星期六, 8月 18, 2007

重蹈覆轍

每一次當我小心奕奕,努力跨過每一步,它總是亦步亦趨。

我嘗試避開,卻總是重蹈覆轍。

是我不小心迷途?

還是我依循過去錯誤的路軌重新上路?

我只覺得...已陷入萬劫不復的境地...

星期四, 8月 16, 2007

網絡

網絡上所有o既情誼,真真假假、假假真真,實在令人無法分辨。

唯有自己小心,不要誤信他人,否則容易陷入兩難局面...

星期五, 8月 10, 2007

一號風球下徹退

今朝已經知道 HK 掛 3 號風球,但澳門一直都只係 1 號波。

到下午返工搭巴士時,聽到o的師奶講話 HK 3 點半會掛 8 號,當時全架巴士o的人都o係度講:點解澳門唔掛 8 號o架?

我返到公司,同公司個阿伯講緊呢件事o既事候,阿伯個手提電話響起...

佢講完電話,同我講:收到最高指示,叫我地執o野收工!

我當然唔信!仲猛話佢呃我!係都打返來公司啦~~

點會打佢手提呀?

跟住公司個電話響起,原來真係我老闆打返來!

佢話:HK 3 點半掛 8 號啦!你地快o的走啦~~

我:而家澳門 1 號風球o乍o咼! =="

佢:走啦!一陣大風大雨,你地返唔到氹仔呀! (我同阿伯都係住氹仔)

結果,我地o係 1 號風球下就收o左工...:p

後記:澳門成個下午都係 1 號風球,夜晚先 3 號!(個風已經走了)

星期三, 8月 08, 2007

RX-8 變形金鋼


這相片是在拍賣網找到的啦!(影得真遜 :P )
我的 RX-8 變形金鋼 還沒有影相(是一模一樣的),因為我懶~~XP
現在比較少了買這等玩具,因為以前公司附近有一間玩具店,是玩具/模型 發燒友的蒲點!
自從公司搬後,已再沒有去 "搜索" 一番了!=="
今日立秋,早上還真有一片迷濛景致!
碰巧還一號風球!
天文台說下午天氣開始轉壞...
還可能掛三號!
哇~~~
我的媽呀!
我今晚還要返學的~~Y.Y

星期日, 8月 05, 2007

變形金鋼

今日去睇 變形金鋼,果然值回票價!
當然,劇情欠奉!純粹睇機械人而已~~
睇完真係想買番套 變形金鋼 超合金 返屋企擺...
不過~~
肯定唔會有電影版o既賣!
因為佢根本無可能由一架車變成電影版咁o既機械人...
諗諗o下...
我上次買o左架 RX8 o既變形金鋼,快o的擺入我個新買o既玻璃櫃先~~xppp
仲有,黃金俠~~
hehe~~

星期四, 8月 02, 2007

發燒

都話自己受不了在大熱天逛街的煎熬!
今日終於都發燒喇!
頭暈暈又想嘔,好似輕微中暑咁...
但因我又無喉嚨痛、傷風等症狀,故又不甘心去幫襯醫生...
睇o下盒"必理痛",有寫發燒可食o咼!
下午就o拍o左粒"必理痛",飲罐 寶礦力,自我醫療。xp
頭先再探熱,又好似無燒了。
不過為o左保險o的,等陣都係食多粒"必理痛",黐塊"退熱貼"先訓...@@"

註:退熱貼 是上次買東東送的小童用退熱貼,唔知我使唔使貼兩塊呢?xp